JOSEF WEINHEBER
(1892 Wien– Kirchstetten 1945)
DIE LANDPARTIE
Resi, Schursch, Mizzi, seids ãlle beinand?
Pãckts eng z'samm, Sunntãg is, heut gehts aufs Land!
Freulich bis Hütteldorf kosserts z'vü Gö'd:
Mir schaun vom Schüttel aus eini in d' Wö'd.
Vurn bei der Hauptallee gengan ma's aun:
Drah di net, du schiabst den Kinderwãgn, Maun!
Resi, den Rucksack nimmst du – und paß auf,
obn in der Höh san die Fleischlaberln drauf.
Schursch, du pãck d'Kandl mi'n Gurkensãlãt!
Lãß die Spassettln sein, trãg ma's schön grãd!
Mizzi, du bleibst bei der Klan vorn am Wãgn,
Gölsen wegwacheln und Mülchflaschel trãgn.
I geh ãls letztes, i gib auf eng ãcht,
drunt untern Lusthaus wird Mittãgsrãst gmãcht.
Durt ham ma Wiesen und Wãsser und Bam,
drinnat in Schülf san die Kroten daham,
Achkatzeln flitzen und Grülln schrein in Grãs,
und übern Sand hupft a Kiniglhãs.
Schurschl, und fischen kannst, Fisch' san durt gnua.
Nimmst dir, wann s' laar is, die Kandl dazua.
Alsern, dã warn ma schon, dã setzts eng her!
Dã is in Umkraas kan Wirtshäusel mehr.
Maun, tua net grantig sein, waaßt as do eh,
's schãdt dir – dafür kriagst an guaden Kaffee.
Schursch, spann es Leintuach auf, mãch uns a Zö't!
Daß ma sein Schãtten hãt, d'Sunn, de is g'föhlt!
Mizzi, fürn Vattern des größere B'steck!
Wia i net hinschau, san d'Fleischlabern weg.
Resi, wãs treibst denn? Die füattert dã hint
d'Fisch mit'n Strudel! Des is do a Sünd!
D'Klane hätt trunken. Jetzt kriagert i Luft.
Kinder, wo seids denn? San de gschwind verduft'!
Les nur dein Zeitung, Maun, lãß die net störn!
I tua derwei auf Kroteng'sang hörn.
Ziag da die Schuach aus und 's Röckl dazua!
Bis auf die Gölsen: A heulige Ruah . .
Jessas, die Söckeln! Ganz neuch und a Loch?
Wann i nur wüßt, wãs i murgn wieder koch . .
(Quelle: Josef Weinheber: Wien wörtlich, Salzburg 1948, S. 53-54)
Anmerkung: im Wiener Dialekt ist das ã ein Laut zwisch a und o - das muß man hören, am besten von Oskar Werner!
Bei einigen Wörtern – Maun, sein, dein, aun
– ist das n am Ende des Wortes hochgestellt, das war in diesem Programm nicht möglich. Dieses n wird nicht voll ausgesprochen, eher angedacht!
Weitere Gedichte finden Sie HIER!
Danke für Ihr Interesse an meiner Website! Wenn Sie meine aktuellen Nachrichten erhalten wollen, schreiben Sie bitte unter: